Здружението за образование ЕдуСкилс со особено задоволство информира дека со свој претставник учествуваше на консултативниот состанок посветен на разгледување на новиот Прирачник со наставни материјали за слободниот изборен предмет „Учам за моето здравје“ за VII одделение.

Настанот се одржа во Скопје, во присуство на наставници, претставници од образовни институции, стручната јавност и партнерски организации. Целта на состанокот беше преку конструктивна дискусија, размена на искуства и предлози од практиката да се придонесе кон финализирање на прирачникот, така што тој да биде функционален, применлив и прилагоден на реалните услови во училиштата.

Особено значајно за ЕдуСкилс е тоа што претставник од нашата организација е дел од тимот за подготовка на програмата за слободниот изборен предмет „Учам за моето здравје“, која се развива во соработка со Светската здравствена организација – Канцеларија во Северна Македонија, како дел од глобалната иницијатива „Училишта што промовираат здравје“ на СЗО/УНЕСКО.

Слободниот изборен предмет „Учам за моето здравје“ опфаќа повеќе значајни теми поврзани со личниот, социјалниот и емоционалниот развој на учениците, меѓу кои:

• ментално здравје;
• емоционална писменост;
• справување со стрес;
• превенција од насилство.

Прирачникот нуди наставни материјали, активности, игри и интерактивни пристапи кои имаат за цел да им помогнат на учениците да развиваат емпатија, да ги препознаваат и регулираат своите емоции, да се справуваат со стресни ситуации и да градат ненасилна и поддржувачка комуникација.

На настанот присуствуваа Милка Тримчевска, директорка на Бирото за развој на образованието, Даниела Јовчевска, директорка на Државниот испитен центар, проф. д-р Елизабета Томевска-Илиевска и проф. д-р Ана Фрицханд, авторки на прирачникот, како и претставници од Државниот просветен инспекторат, Бирото за развој на образованието, УНИЦЕФ, наставници, психолози и други стручни лица.

Нивниот придонес, искуство и професионални согледувања се од големо значење за создавање квалитетни наставни материјали кои ќе бидат вистинска поддршка за наставниците и учениците.

Преку учеството во овој процес, ЕдуСкилс ја потврдува својата посветеност кон развој на современи образовни програми кои го поддржуваат здравјето, благосостојбата, емоционалниот развој и безбедната училишна средина.

Заеднички создаваме алатки што ќе им помогнат на наставниците, а на учениците ќе им овозможат да растат здрави, поддржувани и свесни за својата благосостојба.

ЕдуСкилс – образование за здрави, свесни и поддржани генерации.